耶稣会文献汇编

唔从，唔在乎帝王敬拜与唔敬拜。设使以帝王所敬拜，正从；帝王唔敬拜嘅，就隔绝佢。係咁样，就冇一教可以从得，各样教也可以隔绝佢。因为查考《钢鉴》所载，各样教门，也有帝王与官府出告示，喊人爱遵从佢；也有出告示，禁止人遵从佢。好比秦朝，有只始皇极恼儒教，将儒教该等书完下烧就；将儒教该等读书人，杀死埋开佢。又前汉後汉当时，该等帝王，好多迷惑释教也，唔准子民读儒教嘅书。唐朝当时，迷惑道教，弃绝儒教，凡习儒教嘅人，多有受难来死。宋朝徽宗皇帝，迷惑道教，又隔绝释教。元世祖遵从释教，也禁道教，烧开道教嘅书。又文王当时，有只魏崔浩劝北朝魏王尽杀天下沙门各佛像。虽然有迷惑道教与释教嘅人，但係也有遵从真道，出命令喊人爱传嘅。查考《西安景教碑》所记，唐朝时贞观十二年，宣传命令，满世间爱遵行真道，各州府县准子民建筑教堂。又明朝，万历初初嘅时，有一只宰相，崇信真道，係上海县人，姓徐其名安做光启，查考天道溯原就知。也有清朝康熙君，在北京，题只匾额，畀基督教咁样写倒：“万有真原。”又有对联写倒咁样话：无始无终，先作形声真主宰。宣仁宣义，聿昭拯济大权衡。至到道光二十五年，细查天下各教，正知这基督教，真实全善，与别样异端邪教大不相同。准中外人民传教习练，唔准禁止，又准各处设立教堂，劝人行善，确实有好大益处畀子民啰。

第十节 圣贤恭敬上帝

客问：四书五经，所称赞该等圣人与贤人，至广究嘅。就係尧、舜、禹、汤、文、武、周公、孔、孟、颜、曾、游、夏这等圣贤人，在世当时，佢唔曾讲有真主，也唔曾讲有真神两只字。做乜嘅汝等唔遵圣贤嘅说话，又造出真神两只字，来敬拜佢呢？

答话：吾在先，既然讲明白，爱知吾等所敬拜嘅真神，即係四书五经内所称嘅上帝。真神两只字，与上帝两只字声音虽然唔同，其嘅意思有乜嘅分别。真神嘅意思因谓世间有好多假神，故所以加一只真字来分别。上帝嘅意思，因各国嘅王也称帝，故所以加一只上字来尊敬佢。好比《诗经大雅》篇有写倒话：“殷之未丧师，克配上帝。”意思係话殷朝唔失得天下，因佢有德行来待子民，就得倒上帝来矜恤佢。朱子佢也解明白，上帝係天地嘅主宰。又《诗经小雅》篇有写倒话：“有皇上帝，伊谁云憎。”意思係话，係至大嘅上帝，佢冇私心来憎恼人。程子也话，天係属形体，主宰天嘅就係上帝。既然朱子、程子两只人所讲解真神两只字，声音虽然有分呷，但係其意思就相同，係咁样，就知吾等敬拜嘅真神即上古圣贤人所敬嘅上帝。但係世间该等人，閗多喊上帝嘅名，犯倒真神第三诫，其罪就好大。有等称玉皇做上帝嘅，有等称真武做上帝嘅，又有等称太上老君做上帝嘅，也有称协天做上帝嘅，故所以吾等就称真神上帝来分别，唔与邪神来紊乱。真係可惜，现下该等人，少所见，多所怪，唔查究根本，閗多称有生有死嘅人做上帝。谁不知该只老君，生在周朝，玉皇生在汉朝尾，协天生在後汉，真武乃明朝所对，样边称得做天地嘅主宰呢？佢等唔曾出世当时，先有天地万物，可见佢等係生在有天地嘅後，样边还称得做天地万物嘅主呢？查考四书五经内，只见尧、舜、禹、汤、文、武、周公、孔、孟恭敬服事上帝真主，唔曾听佢敬拜老君、玉皇与各样邪神，好比书经《汤誓》篇有写倒话：“夏氏有罪，予畏上帝，不敢不正。”意思係话，夏桀无道德，残害子民，其罪该当谪罚；汤王敬畏上帝嘅命，唔敢唔去，改除夏桀嘅罪。又曰：“予小子履，敢用玄牡，敢昭告于皇皇后帝。”其意思话，履係属小子，样边敢用黑朱礼来改变，故所以吾敢胆表白我心畀上帝。又曰：“惟皇上帝，降衷于下民。”意思係话，独有至大嘅上帝，用只分道心，畀吾等子民，有的横歪嘅，武王曰：“既获仁人，敢氏承上帝，以遏乱略？”意思咁样讲，武王话，既然得倒仁人君子，佢就敬奉上帝嘅命，来平静当时嘅乱事。又周公曰：“上帝引逸。”其意思係话，上帝畀倒安乐，夏桀来享；佢翻下转，用只恶心来待子民，上帝就弃绝佢。又曰：“维时不保，降者兹大丧。”意思係话，有成时子，上帝唔保护来讲，就畀好大灾难吾等当。又《诗经大雅》篇有咁样写倒：“维此文王，小心翼翼，昭事上帝。”意思係话，文王用只恭敬嘅心，来表明佢服事上帝。又曰：“上帝临汝，无贰尔心。”意思係话，上帝与吾等共在，唔好讷佢有偏心。又曰：“文王陟降，在帝左右。”意思係话，文王佢或者升高或者打低，佢也在上帝嘅左右。又曰：“皇矣上帝，临下有赫，监观四方。”意思即係话，至大嘅上帝，其圣名在这世间好广究，时常监察天下万民。又曰：“荡荡上帝，下民之辟。”意思即係话，至大嘅上帝，係万民嘅君王。《周颂》曰：“无竞维烈，不显成康，上帝是皇。意思係话，成王、康王两只人嘅德行，冇人可以与佢比得，独係上帝就大过佢。”又曰：“於皇来牟，将受厥明，明昭上帝。”其意思即係话，春天尾当时，上帝所赐嘅麦；既然成熟，吾等爱体贴上帝苦心，来多谢佢。《商颂》曰：“圣敬日跻，昭假迟迟，上帝是氏。”意思係话，汤王得上帝畀生命，既然好久，故所以佢爱敬畏上帝。孔子曰：“郊社之礼，所以事上帝也。”意思係话，郊礼係祭天，社礼係祭地，故所以郊社嘅礼即係敬拜上帝嘅礼。孟子曰：“虽有恶人，斋戒沐浴则可以礼上帝。”意思係话，孟夫子咁样讲，虽然有极丑陋嘅恶人，佢晓洁净其心，也可以服事上帝。明道先生有咁样话，天下嘅贤人，满下係上帝嘅臣子。夏商周三代嘅书内，所称上帝嘅名十分多，好难完尽写出来，今下大略讲几只，来做凭据。可见早时该等王帝，与该等圣贤人，所敬拜倚赖嘅，独係真神上帝，也都证得出吾等入教人，恭敬服事上帝，就合早时帝王圣贤嘅教导啰。汝待弃绝上帝，翻下转拜菩萨，就係背逆古圣贤嘅道理，时唔係使人可惜佢吗？

第十一节 儒生亦当从耶稣教

客问：照咁样谈论，可知耶稣，实在係正教。但係孔子嘅儒教，也可以称做正教，做乜嘅从儒教都唔够，又还爱从耶稣教呢？

答话：爱明那样唔够，至紧要，先行查考道理。好比儒教该只儒字，其意思，係称读书人嘅名词，话佢极好学，明白古时与今下嘅事，分别那等係邪，那等係正。查考夏商周该等读书人，独係服事上帝真主，唔拜邪神，咁样就话得真儒教，现今从儒教嘅读书人。其喙读圣贤说话，但係唔照圣贤嘅道理来行，閗多去从该等邪教，好打酒醉，贪心又行奸淫，冇开自家良心。或者拜如来佛，或者拜太上老君，想咁样来得福；或者拜文昌来求名，唔分别真假，唔查考虚实，如同浊水与清水共下流噔。又烧衣化宝，打斋做醮，与食醉酒在梦床，唔知人事噔。係咁样嘅人，称做儒教，实在好羞耻。吾等入教嘅人，就唔係咁样，独係爱谨慎其说话，小心其行为，听从耶稣遗下嘅教训，同心服事真主，守上帝诫命，闪避异端，远隔邪教，弃绝淫行，去假归真，独独行正道，就係耶稣嘅真门生。又四书论语篇，都有写倒话，四海之内，皆为兄弟。意思係讲，生在天下间嘅人类，满下也係兄弟，爱相亲相爱，和和气气，如同一家噔，有过失，就爱劝戒，有善事，就爱勉励来行。互相忍耐，互相仁爱，在生同拜一只神，同倚赖一只主，等到来世，灵魂得救，享天堂冇穷尽嘅福。咁样看起来，时好唔入耶稣教吗？

第十二节 不拜孔子

客问：汝等入教人，知係真儒教，又读孔夫子书，样边讲唔拜孔夫子，係乜嘅缘故呢？

答话：孔夫子所讲嘅等说话，来教後世人，独係劝人，小心恭恭敬敬，表明自家嘅心，服事上帝，佢也唔曾讲教人爱敬拜佢自家。好比有话，郊社嘅礼係敬拜上帝嘅礼，也唔曾讲用郊社嘅礼来拜孔子；又话“获罪於天，无所祷也。”其意思即係话，得罪上帝，冇那里好祈求祷告啰。明道先生也有话，天下嘅贤人，满下係上帝臣子，可见孔也係上帝嘅臣。兼且孔子又话，“天生德於予。”意思係话，其嘅生命德性，係上帝畀倒。可知使孔子生在世间，係上帝主意。既然係上帝主意，做乜嘅还使拜孔子呢？又俗话，侪侪都有讲，孔子係万民嘅先生，应当爱敬拜。吾回答话，孔子也有先生，四书论语有咁样写倒：“我非生而知之者，好古敏而求之者也。”其意思即係话，吾唔係出开世乜嘅都晓，係勤力好学正知嘅。又三字经有写倒，“昔仲尼，师项槖。”其意思係话，孔子佢尊敬项槖，来做其先生。若係孔子爱敬拜，也应该爱拜孔子嘅先生正着。係咁样跟寻来拜，跟到至先行起头该只係那侪呢？即係真神上帝。又係天下各国万民嘅天父，天下万民嘅生啰，所以吾等入教嘅人，敬拜上帝，实係遵孔子嘅教导。汝等唔拜上帝，翻下转拜孔子，唔单止得罪上帝，兼且还得罪孔子添。

第十三节 不拜祖宗

客问：照咁样辨明白来讲，可知真神係天地人物嘅大主宰，应当爱敬拜。但係吾嘅祖宗，係生身嘅大父母，也唔好忘记。好比曾子都有讲，“慎终追远，民德归厚矣。”汝等入教嘅人，唔拜祖宗，係乜嘅缘故呢？

答话：汝想明白乜嘅缘故，先行爱解明白祖宗两只字。祖者本也，宗者根也。人类嘅根本，就係祖宗，生自家完身，係肉身嘅亚爸，亚爸完身，係亚公所生，亚公嘅完身，係太公出下，由咁样来推算，算到初开天地，该只始祖止，就係生吾等始祖公该位上帝啰。因为上帝係人类嘅根本，係祖宗嘅祖宗，所以敬上帝，如同拜祖宗一样。若使唔敬拜上帝，就係丢弃祖宗。好比树冇根，就唔晓生枝叶；水冇源头，就唔晓长流；人类冇始祖，今下该等人，在那里生下来呢？汝等拜祖公，照家中刻倒嘅神主牌，不过係二三十代，照祠堂所刻倒嘅，也不过係百零代止，在百代以前，时有老祖公所生吗，设使冇老祖公，尔屋家该等祖公，从那里来呢？若係既然有老祖公，做乜嘅独係拜新祖公，唔拜该只老祖公呢？咁样看起来，係与贪新忘旧噔。详细来讲，新从老该里来，老又係在新该里结末。新祖当拜，老祖公更过爱拜，因为佢係祖宗嘅祖宗，时唔知孔子有话，“物有本未，事有终始。知所先後，则近道矣。”意思係讲，凡物件有根本，有结末；凡事有起头，有结尾。知其或者在先，或者在後，就近道理啰，今下汝等敬拜祖宗，不过係拜其结末，唔曾拜其根本。拜其结尾，唔曾拜其起头，话得係离开道理好远啰。今下吾又讲，慎终追远嘅道理汝听下子。慎终两只字该意思，即係话父母临死该当时，做子女侪应该尽自家嘅本分，时常在父母该左右，尽心尽力来服事佢，帮助佢，安慰佢，使佢安乐来去世。死後又爱尽本分，预备便衣裳棺材，来埋葬其尸骸，这咁多样，就係慎终两只字嘅意义啰。追远两只字其该意义，又还讲下添，即係追念祖公父母嘅恩情，唔好忘记，又爱守紧遗嘱教人该等好说话，唔好忽略，这就係追远嘅意思啰。但係汝等独係拜几代嘅祖公，唔可以话得係追远，不过係追近止。若想追远，应当爱追到人类嘅根本，正可以话得係追远。这里所讲根本，係样边意思，即係话上帝。所以吾时常有讲过，係敬拜上帝嘅人，佢有祖宗；唔敬拜上帝嘅人，就冇祖宗。又汝等拜祖公所用嘅礼物，不过将酒饭鱼肉摆紧在神主牌嘅面前，或者烧等纸钱，或者烧等纸宝，或者烧等香烛，就係话用咁样礼物，来表自家孝心。照吾看，实係至愚蠢嘅，样边讲呢？看汝摆所有嘅酒肉茶饭，久必定色变味臭，唔曾看倒祖公来食。既然冇来食，摆紧又有乜嘅益呢，好比祖公係想饮食，样边讲独係拜新祖公，唔拜老祖公，时老祖公唔哙饿死吗？

第十四节 不立牌位

客问：汝等唔做神主牌，样边话得係敬祖公呢？

答话：敬祖公与唔敬祖公，唔在乎做神主牌。因为人照俗例设倒嘅，唔係真神着发嘅天道。查考早时人祭祖公，用孙子来做尸，设倒其衣裳，装模作样，就用各样酒肉，来献祭佢，敬拜该只生人如同敬祖公噔。但係在後有等人，就嫌弃咁样形式唔好，因为亚爸拜孻子，亚哥拜老娣噔，好像人伦错乱噔。因咁样就改开佢，立过神主牌。可知人设倒嘅礼仪，可以随时变换，唔同天道，唔可以更改。照咁样来讲，立生人做尸，係错乱人伦，故所以爱改开佢。立神主牌来拜，就係亵渎祖公，也唔可以从。这两样比较下，用孙子来做尸，还係祖公嘅血脉，咁样来拜佢，都还可以讲得。若使用几寸木，係冇灵嘅物件，那里都可以放得，咁样来拜佢，又有乜嘅意思呢？又或者话，立神主牌，係记先人几时出世，乜嘅时途去世，使倒唔可以忘记。殊不知先人出世日了，与死该时期，可以写在族谱，唔可以写在神主牌。因为立神主牌，作为先灵在该里，这就係惹倒後代虚假嘅罪。或者又话，神主牌有喃巫先生，用银硃笔点过主，就有先人三魂七魄在该里，若使安佢唔妥当，就话先人唔安，子孙必定唔好。设使祖先确实可以在神主牌住宿，样边讲夏商周该等圣贤人，唔转来责罚其子孙，做神主牌畀佢住呢？吾等入教嘅人，知善人嘅灵魂上天堂，与真神共下住；恶人嘅灵魂落地狱，与魔鬼共下住；满下唔在世间，走落神主牌该里住，故所以唔立神主牌来亵渎祖公啰。

第十五节 烧纸无益

客问：吾等烧纸银宝，係表明做子女孝心。汝等入教人，做乜嘅唔烧纸钱银宝来敬拜祖公，係样边解呢？

答话：讲论纸钱银宝，满下係诱惑害人嘅事。据汝等讲，祖公在阴间，爱银来使用，係咁样，当畀真钱真银佢用，做乜嘅用纸烧灰来骗佢呢？因为纸係竹料造成嘅，既然烧开就变灰，係至贱嘅物件，样也变得成真钱银呢？虽然烧就南山嘅竹，也唔可以使灰变成钱银，咁样看起来，样边还用得倒呢？设使尔祖公在生当时，汝将纸灰做真银来畀佢，唔单止佢唔爱，翻下转，哙骂汝像发颠一样实在係唔孝顺。可见生唔，可以骗，既然死开嘅人，时可以骗佢吗？孔子有话，“事死如事生，事亡如事存。”意思係话，服事死人，爱与服事生人一样，可知烧纸钱实在係冇损有益。查考《钢鉴》古书，夏商周三代当时，唔曾有纸写字，皆用绢布，或者用竹简。既然冇纸，必定冇得烧，时可以话三代当时冇忠臣孝子吗？又时可以话尧、舜、禹、汤、文、武、周公、孔、孟做唔孝嘅人吗？孟子有话，“不孝嘅罪有五，惰其四肢，不顾父母之养，一不孝也。博奕好饮酒，不顾父母之养，二不孝也。好货财，私妻子，不顾父母之养，三不孝也。纵耳目之欲，以为父母戮，四不孝也。好勇斗狠，以危父母，五不孝也。”意思係话，懒惰耕田，唔做工，又唔寻生理做，游手好閒，唔养父母，这係第一件唔孝顺。好赌博，好打酒醉，唔养父母，这係第二件唔孝顺。贪心钱财好私欲，唔养父母，这係第三件唔孝顺。放纵自家耳朵听淫声，放纵自家眼珠，来看淫色，惹倒父母羞辱，这係第四件唔孝顺。好争斗打交，连累父母有危险，这係第五件唔孝顺。照孟子所讲，也唔曾话唔烧纸钱银宝为唔孝顺，独係汝等唔从圣贤嘅说话，唔从先王嘅道理，任由自家意见，妄烧纸钱银宝来骗父母，这就係唔孝顺嘅人？爱知人类死後，灵魂满下爱受上帝赏罚，若係在生行善，必定赏佢享天堂嘅福；在生行恶，当然罚佢受地狱嘅苦。故所以在天堂享福侪，佢也唔爱纸灰来用；在地狱受苦侪，畀纸灰佢也冇益。兼且人死後，唔嫁，唔娶，唔使饮食，也唔著衣裳，除开这几件以外，钱银有乜嘅用呢？人生在世间当时，有肉身嘅形体，必定用有形样嘅物件，故所以爱买各样器具与衣服，来保护其身体，爱买各样食物来养其生命。人死之後，肉身归土，灵魂係冇形冇样，唔可以用有形有样嘅物件。既然唔用各样物件，汝畀钱银佢，有乜嘅用呢？时常看汝等人，烧等纸钱，敬拜祖公，假名话，表明孝心，实係想求福，大约想保佑子孙昌盛、发财、有功名样事。这等念头，实在至愚蠢嘅，故所以冇奈何，爱解明白。佢殊不知，在生做人祖公侪，那侪唔想其子孙昌盛，那侪唔望子孙发财有功名。虽然有想望嘅心，但係冇帮助嘅力。逢着子孙有病，当危险嘅时，虽然至愚蠢，唔孝顺嘅子女，都唔忍心看佢死，到底唔可以保其生命。咁样看起来，眼晓看，喙哙讲说话，手与脚可以行动做事，尚且冇本事保佑子孙生死；况且死後，肉身变土，样边可以保佑子孙昌盛、发财、有功名呢？时常俗语有话，“死生有命，富贵在天。”意思即係话，一只人或生、或死，在乎上帝主意，或者发财、有功名，也係上帝安排。唔曾听倒死生富贵，在乎烧纸钱祖公啰。又查考历代古书，至有贤德嘅人，就係尧舜两只人，佢也唔可以保其子孙有贤德，来接其位，管理子民，因为尧帝孻子，其名安做丹朱，因佢十分唔孝顺，行为作事，极唔合式，故所以其王位，让畀舜帝来接其位。在後舜帝孻子，其名商均，又係极瘪嘅人，故所以其位让畀夏禹王来做。咁样看尧舜两只人，古今称佢做圣洁君王，佢都唔可以保其子孙，何况今下世间，该等庸夫俗子，死後样边可以保其子孙呢？可见烧纸钱银宝，敬拜祖公，或者有益冇益，或者係有表明子女孝心冇，就可以明白啰。

第十六节 不祭坟墓

客问：孔夫子有咁样话，献祭爱用礼，可知礼唔可以废开佢，做乜嘅唔祭坟墓呢，

答话：拜坟墓这件事，始初因为三月初三係清明节，就出门行嬲。在後嘅人，加多祭坟墓嘅事，唔係圣贤人注重佢。好比孔子，三岁当时，死开亚爸；到二十四岁，又死开亚。当时正知其爸该坟墓在防山，就抬其尸骸去该里埋葬，但係自其爸其死後，唔曾听倒孔子拜坟墓。独係有摆落水，冲崩防山坟墓，孔子就哀切来叫。咁样话，吾听倒古时该等人，唔修整坟墓，吾也想学其样。咁样看起来，孔子唔单止唔祭坟墓，该等坟墓佢也唔修整添，至到佢讲献祭爱用礼，不过係徒循虚假嘅礼。因为礼仪嘅形式，出乎人情，人情必定有偏，就唔係尽都合理。在後嘅人，唔遵服事生时嘅礼，独独藉口死後祭事嘅礼，至紧要爱知，实理就遵从，虚礼就爱改除。又魏文营寿陵，有诏命咁样话，骸骨冇痛痒嘅知觉，坟墓係藏骸骨嘅所在，使倒存亡，冇事待慢，係指明祭坟墓係背礼嘅行为，但係今下该等人，照传竟来嘅俗例，作为祭坟墓係孝敬，谁不知做人子女侪，服事父母，设使虚假，其罪十分大。用铜银欺骗生人，尚且有罪，若使用纸钱元宝与各样假物欺骗死人，自家问心，可以安唔呢，兼且纸，係蔡伦在後汉当时正造倒，元宝係宋武帝所称嘅钱名，孔子在春秋当时，唔曾有用这等祭，更过明白，故所以做人子孙侪，应当在生时爱孝敬，设使父母死後，就爱因时候来扫墓，除净该等草与树仔，加等泥土去添，来记念佢。唔好做欺骗嘅事，就做得啰，时好照世俗规矩来做虚假事吗？故所以吾等，父母在生当时，就孝敬服事，死开用礼埋葬佢，係遵古人实在嘅礼。

讲论祭坟墓嘅根源

查考祭坟墓嘅事，始初见倒在周朝，在後秦汉两朝，就好多人行咁嘅礼。周礼有话，祭坟墓为尸，又话成葬就祭坟墓，孔子有话，向墓来做祭坛。曾子又话，杀牛来祭墓，孟子有讲，到东廓郊外地方来祭坟墓。又武王祭在毕国。这咁多只人，满下讲祭坟墓先行嘅说话。至到秦兴与西戎当时，该等人唔晓理义，就做倒寝庙，在坟墓侧边。因此汉朝，自高帝至宣帝，满下在坟墓侧边做寝庙，每日来献祭。蔡邕看倒祭坟墓咁盛行，佢就咁样话：吾听倒古时人，冇祭坟墓嘅礼。郑樵又话；三代以前，冇祭墓。在後有好多忠心嘅官府，与明白嘅读书人，有好多表章谏人唔好祭墓，爱除开祭墓嘅礼。可知祭墓，係唔合理。到唐开元二十年，以寒食节来祭墓，作为永久嘅礼仪。到宋朝就唔用寒食节，以清明节祭墓。自该当时到今下，以清明做祭墓嘅节。但係书传所记，虽然係祭墓，爱知这样礼，上古时代冇嘅。兼且成葬一祭，係迎精来转，在後唔再祭墓，而祭在庙。後长嘅人，每年上坟墓献祭，其係乜嘅道理呢？设使祖公嘅灵魂，如果在寝庙，或者可以来享献祭，坟墓中独独存到有骸骨，样边晓来享尔献祭呢？早时人既然错在先行，後代人又接紧其错处，传畀後代；早时人既然背逆道理，在後更过背逆道理，这係大略嘅查考。

客话卷二

第十七节 祭祖非孝

客问：做人子孙侪，设倒春天与秋天，两摆献祭，来表明子孙嘅孝心，实在报本追远嘅道理，时可以废开佢吗？

答话：曾子时常教人咁样话，“椎牛祭墓，不若鸡豚逮存。”意思係话，死後杀牛来献祭，唔当生前有鸡肉畀佢食。实在父母死後，係冇知觉，父母在生当时，爱尽自家本分来孝顺。但係今下该等人，父母在生当时，佢就薄待佢；父母死後，翻下转就厚待佢，汤等猪羊来献祭。吾等入教人，唔在乎咁样来献祭，做这等虚假嘅事。係爱父母在生当时，亲身服事其完身，又爱安慰其心，更过爱将主嘅道理，来劝谏佢，来救其灵魂。设若父母死当时，尽自家力量，买衣裳棺材，寻地方来埋葬佢。唔使信风水与地理先生，也唔狂有凶神恶杀，唔论乜嘅时候，都可以扫墓，也可以随时去修整坟墓。若使父母在生，有好行为，做子女侪，就爱照其好行为来做事，这就係武王周王尽孝顺嘅本分。